פֶּרֶק ק"מ
א לַמְנַצֵּחַ מִזְמוֹר לְדָוִד. ב חַלְּצֵנִי יְהוָה מֵאָדָם רָע; מֵאִישׁ חֲמָסִים תִּנְצְרֵנִי. ג אֲשֶׁר חָשְׁבוּ רָעוֹת בְּלֵב; כָּל-יוֹם יָגוּרוּ מִלְחָמוֹת. ד שָׁנְנוּ לְשׁוֹנָם כְּמוֹ-נָחָשׁ; חֲמַת עַכְשׁוּב תַּחַת שְׂפָתֵימוֹ סֶלָה. ה שָׁמְרֵנִי יְהוָה מִידֵי רָשָׁע מֵאִישׁ חֲמָסִים תִּנְצְרֵנִי; אֲשֶׁר חָשְׁבוּ לִדְחוֹת פְּעָמָי. ו טָמְנוּ-גֵאִים פַּח לִי וַחֲבָלִים פָּרְשׂוּ רֶשֶׁת לְיַד-מַעְגָּל; מֹקְשִׁים שָׁתוּ-לִי סֶלָה. ז אָמַרְתִּי לַיהוָה אֵלִי אָתָּה; הַאֲזִינָה יְהוָה קוֹל תַּחֲנוּנָי. ח אֲדֹנָי יְהוִה עֹז יְשׁוּעָתִי; סַכּוֹתָה לְרֹאשִׁי בְּיוֹם נָשֶׁק. ט אַל-תִּתֵּן יְהוָה מַאֲוַיֵּי רָשָׁע; זְמָמוֹ אַל-תָּפֵק יָרוּמוּ סֶלָה. י רֹאשׁ מְסִבָּי; עֲמַל שְׂפָתֵימוֹ יכסומו (יְכַסֵּמוֹ). יא ימיטו (יִמּוֹטוּ) עֲלֵיהֶם גֶּחָלִים; בָּאֵשׁ יַפִּילֵם בְּמַהֲמֹרוֹת בַּל-יָקוּמוּ. יב אִישׁ לָשׁוֹן בַּל-יִכּוֹן בָּאָרֶץ; אִישׁ-חָמָס רָע יְצוּדֶנּוּ לְמַדְחֵפֹת. יג ידעת (יָדַעְתִּי) כִּי-יַעֲשֶׂה יְהוָה דִּין עָנִי; מִשְׁפַּט אֶבְיֹנִים. יד אַךְ צַדִּיקִים יוֹדוּ לִשְׁמֶךָ; יֵשְׁבוּ יְשָׁרִים אֶת-פָּנֶיךָ.
פֶּרֶק קמ"א
א מִזְמוֹר לְדָוִד: יְהוָה קְרָאתִיךָ חוּשָׁה לִּי; הַאֲזִינָה קוֹלִי בְּקָרְאִי-לָךְ. ב תִּכּוֹן תְּפִלָּתִי קְטֹרֶת לְפָנֶיךָ; מַשְׂאַת כַּפַּי מִנְחַת-עָרֶב. ג שִׁיתָה יְהוָה שָׁמְרָה לְפִי; נִצְּרָה עַל-דַּל שְׂפָתָי. ד אַל-תַּט-לִבִּי לְדָבָר רָע לְהִתְעוֹלֵל עֲלִילוֹת בְּרֶשַׁע אֶת-אִישִׁים פֹּעֲלֵי-אָוֶן; וּבַל-אֶלְחַם בְּמַנְעַמֵּיהֶם. ה יֶהֶלְמֵנִי-צַדִּיק חֶסֶד וְיוֹכִיחֵנִי שֶׁמֶן רֹאשׁ אַל-יָנִי רֹאשִׁי: כִּי-עוֹד וּתְפִלָּתִי בְּרָעוֹתֵיהֶם. ו נִשְׁמְטוּ בִידֵי-סֶלַע שֹׁפְטֵיהֶם; וְשָׁמְעוּ אֲמָרַי כִּי נָעֵמוּ. ז כְּמוֹ פֹלֵחַ וּבֹקֵעַ בָּאָרֶץ; נִפְזְרוּ עֲצָמֵינוּ לְפִי שְׁאוֹל. ח כִּי אֵלֶיךָ אֲדֹנָי יְהוִה עֵינָי; בְּכָה חָסִיתִי אַל-תְּעַר נַפְשִׁי. ט שָׁמְרֵנִי מִידֵי פַח יָקְשׁוּ לִי; וּמֹקְשׁוֹת פֹּעֲלֵי אָוֶן. י יִפְּלוּ ב…